Proverbs 16

1Umuntu angawabumba amacebo ngenhliziyo yakhe, kodwa uJehova nguye omupha amazwi okuwachaza.

2Umuntu angabona sengathi zonke izindlela zakhe ziqondile, kodwa uJehova uyazihlolisisa zonke izinjongo zomuntu.

3Nikela kuJehova konke okwenzayo, kuzaphumelelisa wonke amacebo akho.

4UJehova uzilungisele isiphetho sakho konke – kanye lababi usuku lokubhujiswa.

5UJehova uyabazonda bonke abazikhukhumezayo. Ngempela kabayikuphepha ukujeziswa.

6Isono siyahlawulelwa ngothando langokwethembeka; ngokwesaba uJehova umuntu uyaphepha ebubini.

7Nxa izindlela zomuntu zimthokozisa uJehova, uyenza lezitha zakhe zihlalisane laye ngokuthula.

8Kungcono ukuzuza okulutshwana ngendlela elungileyo kulokuzuza okunengi ngobuqili.

9Umuntu angalungisa indlela yakhe engqondweni yakhe, kodwa uJehova nguye olawula izinyathelo zakhe.

10Izindebe zombusi zikhuluma kungathi lidlozi ngakho umlomo wakhe kawungaphambuli umthetho.

11Izilinganiso eziqondileyo zivela kuJehova; zonke izisindo ezisemgodleni zenziwa nguye.

12Amakhosi ayakuzonda ukwenza okubi, ngokuba isihlalo sobukhosi sakhelwe phezu kokulunga.

13Amakhosi athokoziswa yizindebe ezithembekileyo; ayamazisa umuntu okhuluma iqiniso.

14Ulaka lwenkosi luyisithunywa sokufa, kodwa umuntu ohlakaniphileyo uyaluxolisa.

15Nxa ubuso benkosi bulentokozo, kukhomba ukuphila; ukuthandwa yiyo kunjengeyezi lezulu entwasa.

16Kungcono kangakanani ukuzuza ukuhlakanipha kulegolide, ukukhetha ukuzwisisa kulesiliva!

17Umgwaqo womuntu oqotho uceza ububi; lowo onanzelelayo indlela yakhe unanzelela impilo yakhe.

18Ukuzigqaja kwandulela ukubhujiswa, umoya omubi ulandelwa yikuwa.

19Kungcono umoya othobekileyo lokuhlala kwabacindezelweyo kulokwabelana impango labazigqajayo.

20Lowo olalela izeluleko uyaphumelela, njalo ubusisiwe lowo othemba Jehova.

21Abahlakaniphileyo enhliziyweni kuthiwa bayaqedisisa, njalo amazwi amnandi aqinisa izeluleko.

22Ukuzwisisa kungumthombo wokuphila kulabo abalakho, kodwa ubuwula buletha isijeziso eziwuleni.

23Inhliziyo yomuntu ohlakaniphileyo ikhokhela umlomo wakhe, kanti lezindebe zakhe zikhuthaza izeluleko.

24Amazwi amahle alikhekheba loluju, amnandi emphefumulweni njalo ayelapha emathanjeni.

25Kukhona indlela ebonakala iqondile emuntwini, kodwa ekucineni ikhokhelela ekufeni.

26Isisebenzi sifuqwa liphango ukusebenza kakhulu; ukulamba yikho okusikhuthazayo.

27Isixhwali siceba ububi, lenkulumo yaso injengomlilo ohaqazayo.

28Umuntu ongelangqondo udaza inkani, njalo lomuntu onyeyayo wehlukanisa abangane.

29Umuntu wodlakela uhuga umakhelwane wakhe amholele endleleni engalunganga.

30Lowo ofica ngelihlo lakhe uceba izibozi; lowo oluma indebe zakhe uqonde ububi.

31Izinwele ezimhlophe zingumqhele wobukhulu, zizuzwa ngempilo elungileyo.

32Ungcono umuntu obekezelayo kuleqhawe, umuntu ozinqandayo ulaka lwakhe kulalowo othumba idolobho.

33Inkatho iphoselwa enkundleni, kodwa isinqumo sayo sisemandleni kaJehova.
Copyright information for NdeIBE